Panh, a 6 km da Saluces, es lo centre de la pichòta e verda val Bronda.
L’istòria d’aquesta comunitat es liaa al famós Monasteri d’sant Colomban, fondat ental 750 per volontat del rei longobard Astòlf. Devengut fito un di pus importants centres culturals e religiós, la sia espansion finìs ental 850 embè l’anession del Monasteri a l’Abadia d’la Novalesa. Paginas gloriosas laisson lo pòst a la roina fins al 1764, an de la supression del Priorat de Panh e de l’union a la Diòcesi d’Saluces. L’abadia ven realizaa en dui moments diferents, sempre en epoca romanica, entre lo XI e lo XII secle. La façada de la gleisa en estil romanic es decoraa al centre da una faissa d’arquets, sot tres monòforas encuei tamponaas. Autras monòforas se tròbon sus las tres muralhas lateralas. Lo cloquier del 1300 es en estil lombard gòtic, embè d’arquets en terra cuecha adobrats coma marcaplan e quatre biforas, al principi dividuts da colonas. La gleisa encuei presenta una soleta navaa embè chapèlas lateralas; dins una d’aquestas es muraa una lapid paleocristiana. En l’antica navaa de drecha se tròbon de frescs, coma un sant Cristòfo e l’Arcangel sant Michel, atribuït a l’escòla del pintre flamand Hans Clemer (XV secle).
La popolacion de Panh es empenhaa en la campanha, sustot per la frucha e las vinhas; ramasins, poms d’la val Bronda (lhi productors an creat un consòrci per garantir genuinitat e qualitat) e lo Pelaverga, un vin ros delicat, dal profum de frucha.