VAL VARACHA

La Val Varacha cuerb 70 quilòmetros da Costilhòlas fins al Còl d’l’Anhèl, ente una via panoramica, que trucha lhi 2744 metres del còl, la unìs a la valada francesa del Cairàs.
Lo Viso, piramida de ròcha oceanica, lo “vesulus pinifer” chantat da Dante, renha s’la valada, mas sa vision se perd quora lhi ervincs d’la via començon a s’rampinhar. Siu contorn unic pareis mai en quòta, embè de panoramas que se pòlon pas desmentear.
Païsatges extraordinaris arribon un après l’autre: lhi clòts suèlis del premier tòc devenon païsatges alpins, verdas pasturas e prats drechs, grands bòscs, melzes e elvos. La valada dicha “esmeraldina” garda mila varietat d’verd en sa vegetacion drüa.
Dempertot pareisson pilons, pichòtas chapèlas e santuaris sus aigavers e brics, testimonianças d’un passat ric de trafics e devoccion, cultura e art.
Pòst ideal per lhi esportius, la valada presenta grandas ofèrtas sie d’istat que d’uvèrn. Per qui vòl butar-se a la pròva en bici, montar al còl es una legenda; palestras d’ròcha, ferraas e falesias espectacularas tiron climbers amanats e principiants, percors panoramics arlòng la valada son d’itineraris ideals per lo MTB e l’uvèrn per las chastras. Lhi centres per l’esquì alpin e nòrdic fan amusar e per lhi apassionats del glaç lhi a de miticas cascadas, da ren perdre.
La tradiccion occitana que caracteriza la part auta d’la valada, sustot en la lenga, es enca’ ben fòrta. Lhi a de testimonianças d’aqueste moment propici dempertot: arquitectura des maisons, costumas, festas, artisanat del bòsc.
La Val Varacha fai gòi decò per la question enogastronòmica, embè produchs tipics: pichòtas empresas agricolas, formatges renomats, salams apetissants, chastanhas e bolets gustós, liquors d’erbas e vins aboquevols.
Un grand panorama da descurbir, un païsatge galhard e generós, un patrimòni de tradiccions jamai desmenteaas, una tèrra de frontiera richa de sugestions…
Un envit da pilhar al vòl!

Per n’en saber de mai sus istòria, costumas, tradiccions, fòravias d’la Val Varacha conselhem de leser D. ROSSI, val varaita, Guida a una valle occitana sorprendente per le tradizioni, affascinante per i paesaggi, +eventi edizioni, Cuneo, 2009.

Se pòl trobar a l’ Union d’ las Comunas d’la Val Varacha, p.zza Marconi 5 a Fraisse, info@unionevallevaraita.it tel. 0175/978321, en las librerias d’la valada e d’la Provincia d’Coni